Impakaammo ti Philippine Atmospheric, Geophysical and Astronomical Services Administration (PAGASA) ita, Oktubre 7, ti opisial a panaggibus ti tiempo ti southwest monsoon, wenno ti panawen ti nepnep wenno "abagat" (aggapu iti abagatan).
Segun iti panagamiris ti PAGASA, kimmapuyen ti angin ti abagat kadagiti napalpalabas nga aldaw, ket napaliiwda a pumigpigsa ti high pressure iti East Asia a mamagbaliw iti kasasaad ti panawen iti pagilian.
Kinuna ti PAGASA nga in-inut nga agbalbaliwen ti panawen iti northeast monsoon, wenno ti makunkuna nga "amian" (aggapu iti amianan) a mabalin a mangrugi iti umay a lawas.
Ti panagsaknap ti angin iti amianan a daya, didaya (easterlies), ken ti intertropical convergence zone (ITCZ), agraman dagiti masansan a panaggurruod, ket pagilasinan a sumreken ti pagilian iti panawen ti amian. (Ellalyn De Vera-Ruiz/Manila Bulletin//Lito Hilidon/Bannawag)
