Binallaagan ti defense minister ti Israel itay Oktubre 9 a "makapapatay" ken "nakaskasdaaw" ti pammalesda iti nabiit pay a panangraut ti Iran babaen ti missile, bayat ti panagpatang da Prime Minister ti Israel Benjamin Netanyahu ken Presidente ti Estados Unidos (US) iti umuna nga awagda iti las-ud ti pito a lawas.
Iti Gaza, pinullo ti natay a tattao iti dakkel nga operasion nga inwayat ti Israel iti amianan a paset ti teritorio ti Palestina, ket nagserra ti tallo nga ospital iti nasuroken a makatawen a pannakakigubat iti Hamas.
Agtultuloy ti pannakadadael ken kaadu ti matmatay iti Gaza, a pinarnuay ti panangraut ti Hamas iti abagatan nga Israel idi Oktubre 7, 2023, bayat ti panangilayon ti Israel iti makalawas nga opensiba maibusor iti Hezbollah iti Lebanon ken pampanunotenda ti dakkel a pammales a panangraut iti Iran kalpasan ti panangaramat ti Iran iti missile kontra iti Israel idi Oktubre 1.
Pagsasaritaan ti Israel no kasano ti panangsungbatda iti panangraut ti Iran, a tinulongan ti Estados Unidos a sinangga. (Associated Press/Manila Bulletin//Lito Hilidon/Bannawag)
