Impangta manen ti lider ti North Korea a ni Kim Jong Un a di agpangngadua a mangaramat kadagiti armasna a nuklear kontra iti South Korea ken Amerika gapu iti kunana a panangprobprobokar dagitoy dua a pagilian iti North Korea, impakaammo ti prensa ti pagilian a North Korea idi Okt. 8.
Sakbayna, impangpangtan ni Kim ti panagaramatna kadagiti armas a nuklear, ngem iti daytoy naudi a ballaagna, maigapu iti kuna dagiti eksperto iti ruar ti North Korea a pangrubrubrob ti North Korea iti riri iti nagbaetan ti US ken North Korea sakbay ti eleksion presidensial ti U.S. Iti panagsarita ti pangulo ti North Korea iti unibersidad a naipanagan kenkuana, ti Kim Jong Un University of National Defense, kinunana a di agpangngadua ti North Korea a mangaramat iti amin a puersana kontra kadagiti kalaban ti pagilian “no panggepen dagitoy a kalaban ti agaramat iti puersa militar,” kas inreport ti Korean Central News Agency ti North Korea.
Mapapati a daytoy kuna ni Kim a panangprobprobokar ti South Korea ken ti Amerika iti North Korea isu ti panagtulag itay nabiit ti South Korea ken US a pagtiponenda ti kombensional a kapabilidad ti South Korea ken ti kabaelan a nuklear ti US kas pangontrada iti rumabraba a panagipangpangta ni Kim a panagusarna kadagiti armas a nuklear.
Kinuna ketdi dagiti opisial ti US ken South Korea nga iti kanito nga agaramat ti North Korea kadagiti armas a nuklear, ditoy metten nga aggibus ti gobierno ni Kim. (AP/Manila Bulletin// Cles B. Rambaud/Bannawag)
