Nagballaag ti EcoWaste Coalition, maysa a toxic watchdog, idi Biernes, Oktubre 11, iti kaadda dagiti mailaklako nga stainless a pagkargaan iti danum ken tumbler a napinturaan iti nangato ti laokna a lead.
Mainaig daytoy a pakaammo iti pannakarambak ti Consumer Welfare Month ita a bulan ken iti panangpasungad ti International Lead Poisoning Prevention Week inton Oktubre 20 agingga iti Oktubre 26.
Dinawat ti grupo kadagiti agtuturay nga ipatungpalda koma ti “maipalubos a kaadu ti lead” iti pintura a mausar kadagiti stainless a botelia ti danum ken tumbler, ken ti panangikkatda kadagiti pagtagilakuan kadagiti produkto a saan a nakatungpal iti daytoy a paglintegan agraman dagiti tagilako kadagiti online shopping platform.
Nagramut daytoy a panawagan ti EcoWaste Coalition kalpasan a matakuatanda nga adu ti reusable a botelia ti danum ken tumbler a napinturaan iti addaan iti nangato a lead a napeggad iti salun-at.
Mangnamnama ni Marcos iti pannakaisubli ti panangipateg ni Pinoy iti arte a Filipino
Babaen ti DENR Administrative Order 2013-24, masapul a saan nga nangatngato ngem 90 parts per million (ppm) ti lead dagiti pintura a mausar a surface coating.
Kadagiti 30 a reusable steel water bottle ken tumbler nga inamiris ti EcoWaste Coalition ti pintura dagiti akinruar a dekorasionna, babaen ti X-ray fluorescence (XRF), 15 kadagitoy a produkto ti addaan iti nasursurok a 90 ppm a lead—a ti sangapulo, napeggad unay ta immabot iti 10,000 ppm ken ti maysa, addaan iti 100,000.
Segun iti grupo, awan kadagitoy a produkto ti pakakitaan iti ballaag a napeggad daytoy iti salun-at. (Jel Santos/Manila Bulletin//Juan A. Asuncion/Bannawag)
