Inallukoy ni Presidente Ferdinand Marcos Jr. (PBBM) dagiti kameng ti Association of the Southeast Asian Nations (ASEAN) a mapapardas koma ti negosiasion ti ASEAN-China Code of Conduct (COC), bayat nga insennaayna ti panangriribuk ken panangbutbuteng dagiti puersa ti China iti South China Sea.
Daytoy ti kinuna ni Presidente Marcos iti 27th ASEAN-China Summit iti Laos itay Oktubre 10.
Segun ken ni PBBM, nakalkaldaang ta agtalinaed a nabara ken saan a nagbaliw ti sapasap a kasasaad iti South China Sea.
Linagip ni PBBM ti sinagrap dagiti bapor ti Filipinas iti Chinese Coast Guard iti Escoda Shoal idi Agosto. Imbinglayna pay ti padas ti Filipinas idi pinaturongan iti laser ken binutbuteng ti bapor ti People’s Liberation Army (PLA) ti bapor dagiti sibilian a mangngalap.
Blazers, inatiwda ti Red Lions; kasangoda ti Cardinals iti NCAA finals
Kinuna ni PBBM a ti agtultuloy a pamutbuteng ti China ti mangiparang ti di panagraem ti China iti UNCLOS ken iti 1972 Convention on the International Regulations for Preventing Collisions at Sea (COLREGS).
Gapu itoy, dinagadag ni PBBM dagiti pagilian a kameng ti ASEAN a maanamongan ti ASEAN-China COC tapno mataming ti agtultuloy a panangriribuk ti China iti Filipinas. (Argyll Cyrus Geducos/Manila Bulletin//Lito Hilidon/Bannawag)
