Mapapati a pinapatay ti maysa a soldado ti asawana, katuganganna a babai, ken drayberna iti uneg a mismo ti Camp Melchor dela Cruz, headquarters ti Army 5th Infantry Division iti Barangay Upi, Gamu, Isabela idi malem ti Huebes, Oktubre 10.
Segun ken ni Police Staff Sgt. Kennedy C. Gorospe, case officer ti PNP-Gamu, nabigbig ti suspek a ni Army Sgt. Mark Angelo Ajel, 32, a nakadestino iti 503rd Infantry Brigade iti Siudad ti Tabuk, Kalinga.
Naammuan iti panagimbestigar ti polisia a nangngegan laengen dagiti putok ti paltog manipud iti maysa a van a nakaparada iti uneg ti kampo ket daras a napan kinita da Army Sgt. Rommel Narag ken Army Staff Sgt. Perfecto Prudencio. Nadatnganda ni Ajel a nakaiggem iti paltog idinto a nakitada iti uneg ti lugan ti daradara a bagi ti driver ti van a ni Rolando Amaba, ti asawa ni Ajel a ni Erlinda, 35, ken ti katuganganna a ni Lolita Ramos.
Tiniliwda ni Ajel ken naitaray iti ospital dagiti biktima a nakaideklararan dagitoy a pimmusay.
Ilocos Sur, Umuna a Puesto iti Regional SubayBAYANI Awards
Naammuan nga agpapada a taga-Benito Soliven, Isabela dagiti biktima.
Naala iti nakapasamakan ti krimen ti innem nga empty shells ken maysa a naiputok a bala manipud iti kalibre 9mm a pistola.
Addan iti kustodia ti PNP ti suspek ket madama a maim-imbestigar no ania ti motibo ti suspek iti panangpalpaltogna kadagiti biktima. (Freddie Lazaro/MANILA BULLETIN// RVAragon/Bannawag)
