Pinabasol ti China ti Estados Unidos (US) a mangparparnuay iti komprontasion iti Indo-Pacific babaen ti maatap a panangikabilna kadagiti armas ken panangpaaduna kadagiti aktibidad militar iti South China Sea.
Kinuna ni panakangiwat ti Foreign Ministry ti China Mao Ning a ti US ti kangrunaan a paggapuan ti kinaawan kinatalged iti South China Sea, bayat a sinungbatanna ti panangkondenar ni State Secretary ti US Antony Blinken iti kinaranggas ti China iti baybay.
Impetteng ni Ning ti panangtagikua ti China iti entero a South China Sea ket naibatay iti kalinteganna iti teritoriona ken naipasdek daytoyen iti historia ken paglintegan.
Kinuna pay ni Ning a ti laeng China ken dagiti maseknan a pagilian iti South China Sea ti addaan sirib ken kabaelan a mangrisut ti riri babaen ti konsultasion ken panangtengngelda iti situasion iti baybay. (Joseph Pedrajas/Manila Bulletin//Lito Hilidon/Bannawag)
