Insayangkat ti China dagiti dadakkel a panagsanay-militar iti aglikmut ti Taiwan ken dagiti islana ita, Oktubre 14, kas panangballaagna kontra iti panagwaywayas ti Taiwan.
Kinuna ti Defense Ministry ti China a naangay dagiti panagsanay a kas sungbat iti panagkedked ni Presidente ti Taiwan Lai Ching-te iti kiddaw ti China a bigbigen ti Taiwan a paset ti People's Republic of China iti panangituray ti Communist Party.
Imbilang ti Defense Ministry ti Taiwan dagiti panagsanay a kas pananggargari ket kinunana a sisasagana ti puersada a sumungbat.
Kinuna ni panakangiwat ti Eastern Theater Command ti PLA Navy Senior Captain Li Xi a nakipaset ti navy, army, air force, ken missile corps iti panagsanay. Innayon ni Li a maysa daytoy a ballaag kadagiti pagilian a mangbigbig iti panagwaywayas ti Taiwan ket mangipasimudaag a kasapulan a salaknibanda ti teritorioda.
Resolusion ti UN nga agkidkiddaw ti ceasefire iti Gaza, saan a pinaboran ti Estados Unidos
Dati a kolonia ti Japan ti Taiwan sakbay a naikamang iti China idi agleppas ti World War II. Simmina ti Taiwan idi immay ni Nasionalista a Chiang Kai-shek iti isla idi 1949 bayat ti panagturay ni Komunista a Mao Zedong iti kadaklan ti China.
Nagturay ni Lai idi Mayo, kas panangitultuloy iti walo a tawen a panagturay ti Democratic Progressive Party a mangilaklaksid iti kiddaw ti China a bigbigenna koma ti Taiwan a paset ti China.
Kanayon nga ibagbaga ti China nga awan ti pagturongan ti panagwaywayas ti Taiwan. Innayonna a ti pannakaitipon daytoy iti China ket di maliklikan a mapasamak iti historia. (ASSOCIATED PRESS/Manila Bulletin//Lito Hilidon/Bannawag)
