Imbilin ti Department of Agriculture (DA) ita, Oktubre 14, ti napardas a pannakairuar ti PhP93.8 a milion manipud iti Philippine Crop Insurance Corporation (PCIC) kadagiti naiseguro a mannalon iti Cordillera, Ilocos, ken Cagayan Valley nga inapektaran ni Super Typhoon Julian.
Kinuna ni Sekretario ti DA Francisco Tiu Laurel Jr. a masapul a mairuar iti kabiitan a panawen dagiti insurance claim tapno masinunuo ti pannakaallangon ti agrikultural a produksion.
Segun iti PCIC, agarup 10,781 a mannalon nga agmulmula iti pagay, mais ken nabalor a mula ti masakup ti insurance iti Cordillera Administrative Region (6,585), Ilocos Region (2,355), ken Cagayan Valley (1,841).
Inkari ni pangulo ti PCIC Jovy Bernabe a papardasenda ti proseso tapno matulongan dagiti mannalon a naapektaran.
Blazers, inatiwda ti Red Lions; kasangoda ti Cardinals iti NCAA finals
Malaksid iti insurance, impanamnama ti DA ti pannakaipaay iti PhP166.67 a milion a balor ti ramit a pagtalon agraman bukel ti irik, mais, ken natnateng, kasta met ti mabalinda nga utangen a PhP25,000 a mabalinda a bayadan iti las-ud ti tallo a tawen nga awan ti interesna, babaen ti Survival and Recovery Loan a programa ti Agricultural Credit Policy Council (ACPC).
Idi Okt. 7, impakaammo ti DA nga agarup PhP607.38 a milion ti balor ti nadadael iti agrikultura iti nadumaduma a rehion gapu ken ni Julian a nangapektar iti 33,110 a mannalon.(Stephanie Sevillano/PNA/Lito Hilidon/Bannawag)
