Mareprepaso ita dagiti reclamation project iti Manila Bay, kas imbilin ni Presidente Marcos Jr., segun ken ni Secretary ti Department of Environment and Natural Resources (DENR) Maria Antonia “Toni” Yulo-Loyzaga, ket malpas daytoy sakbay nga agleppas ti tawen.
Sakbayna, kinuna ni Loyzaga iti bista ti badiet ti DENR iti Kamara idi Agosto, a malpas ti pannakarepaso dagiti reclamation project iti Manila Bay iti maikadua a lawas ti Septiembre.
Nadumaduma a grupo ti nanggutigot iti DENR a pasardengenna dagiti reclamation project iti Manila Bay gapu ta dangran dagitoy ti aglawlaw.
Segun iti grupo a Pambansang Lakas ng Kilusang Mamamalakaya ng Pilipinas (Pamalakaya), dagiti reclamation project ti nangpakaro iti panaglayus iti amianan a paset ti Manila Bay. (Jel Santos/Manila Bulletin//Lito Hilidon/Bannawag)
