Inangay ti Armed Forces of the Philippines (AFP) ti nadaeg a pammadayaw iti kinatured ken kinaandur nga impakita dagiti puersa ti gobierno idi napasamak ti Marawi Siege idi 2017.
Indauluan ni Chief of Staff ti AFP General Romeo Brawner Jr. ti seremonia iti Rizal Park ita, Oktubre 15, babaen ti pannakatinnulong ti Makati Medical Center (MakatiMed) Foundation. Naangay daytoy makalawas sakbay ti maikapito a tawen ti pannakadarup ti Marawi inton Okt. 23.
Idi Mayo 23, 2017, nakiranget dagiti puersa ti gobierno kadagiti nasurok a 1,000 a lokal ken ganggannaet a terorista, nangruna iti Maute Group (MG), a nakitunos iti Islamic State (IS), tapno makemmegda ti daulo ti Abu Sayyaf Group (ASG) a ni Isnilon Hapilon. Iti dayta a tiempo, natakuatan ti militar ti plano dagiti grupo ti terorista a mangipasdekda iti “wilayat” wenno administratibo nga estado ti IS iti Mindanao.
Ti terorista a Maute Group, nga indauluan dagiti agkabsat nga Omar ken Abdullah Maute, ti nanglakub iti siudad babaen ti tulong dagiti rebelde nga ASG.
Blazers, inatiwda ti Red Lions; kasangoda ti Cardinals iti NCAA finals
Naagaw dagiti puersa ti gobierno ti Marawi City kadagiti terorista idi Oktubre 17, 2017 kalpasan ti ipapatay da Hapilon ken dagiti agkabsat a Maute. Kalpasan ti innem nga aldaw, nalpasen ti gubat, ket naibilang dayta a kaatiddogan a gubat iti siudad iti pakasaritaan ti pagilian.
Nairaman iti bilang dagiti natay ti 168 a tropa ti gobierno, 87 a sibilian, ken 920 a terorista. (Martin Sadongdong/Manila Bulletin//Lito Hilidon/Bannawag)
