Angayen ti Gunglo Dagiti Mannurat nga Ilokano iti Filipinas ken iti Ballasiw-Taaw (GUMIL Filipinas) ti “Dap-ayan 2024: Komperensia iti Literatura ken Lengguahe ken Pannakarambak ti Maika-56 nga Anibersario ti GUMIL Filipinas” iti Siudad ti Candon iti daytoy Oktubre 18-20.
Addaan iti tema a “Ni Mannurat nga Ilokano ken ti Lubongna,” manamnama a dar-ayan daytoy ti 150 a delegado a buklen dagiti mannurat, iskolar, ken mannursuro nga Ilokano.
Agpaay a kangrunaan nga agsarita ni Dr. Arthur P. Casanova, pangulo ti Komisyon sa Wikang Filipino (KWF). Manamnama pay a dumar-ay ken mangipaay iti naisangsangayan a mensahe ni Gobernador Jeremias “Jerry” Singson ti Probinsia ti Ilocos Sur, Dip. Grace Kristine Singson-Meehan ti Maikadua a Distrito ti Ilocos Sur, ken Mayor Eric Singson ti Siudad ti Candon.
Marugian ti Dap-ayan iti alas kuatro iti malem ti Biernes, Oktubre 18, babaen ti pannakayalnag ti duapulo ket lima (25) a libro.
ALLON TI BIAG: Walo A Dekada A Panagdaliasat (32)
Iti umuna a rabii, mayawat ti premio dagiti nangabak kadagiti nadumaduma a salip iti panagsurat nga inwayat ti Albalos Awards, AMMA Foundation Literary Awards, Pasalip ALVIYA ken Saniata Literary Awards.
Mapadayawan met ni Joel B. Manuel a kas 2024 Pedro Bucaneg Awardee.
Iti maikadua nga aldaw, Sabado, maiwayat ti agmalem a tungtongan (panel discussion) a maluktan met kadagiti walk-in participant.
Napauluan dagiti tungtongan iti “Ti Literatura Dagiti Ilokano iti Lubong Dagiti Ubbing,” “Ti Panangistoria ni Ilokano iti Lubongna,” “Ni Mannurat nga Ilokano ken Dagiti Nadumaduma a Platform-na,” “Ni Mannurat nga Ilokano ken Dagiti Entabladona,” “Panangsirig Kadagiti Nailanad ken Naipasdek Maipapan iti Ilokano ken Kinailokano ken iti Serbida iti Agdama a Kasasaad ti Biag,” “Ti Lubong ni Ilokano Kadagiti Istoria Dagiti Mannurat nga Ilokano iti Imatang ti Akademia.”
Iti maikatlo nga aldaw, Domingo, maangay ti Maikapito a Tungtongan a napauluan iti “Kastoykami Idi, Kasanokayo Met Ita?”
Agsarita kadagiti tungtongan ti tallopulo ket maysa (31) a mannurat ken mannursuro manipud kadagiti nadumaduma a chapter ti GUMIL ken unibersidad a pakairamanan ti University of the Philippines, University of Northern Philippines, Cagayan State University, ken Mariano Marcos State University.
Kas pangrambak iti Maika-56 nga Aniberasario ti gunglo, maiwayat ti Rabii ti Kultura iti rabii ti Sabado a pakaiparangan dagiti nadumaduma nga oral tradition dagiti Ilokano a kas iti dallot ken panangdaniw iti reyna. Manamnama pay a maiparang ti maysa a parang ti drama iti radio. (Mark Louie Tabunan)
