Kinuna ti Korte Suprema (SC) a saan a maibilang nga empleado ti gobierno dagiti mangmangged nga agpapaay a contract of services (COS) wenno job order (JO) nga innala ti Philippine Amusement and Gaming Corporation (PAGCOR), segun iti sakupen ti Civil Service Commission (CSC).
Iti pangngeddeng ti SC idi Hunio 19, inkeddeng ti Supreme Court First Division a ti bunggoy dagiti mangmangged iti PAGCOR a nagtrabaho iti hotel ken restaurant a negosio daytoy, ket maibilang a COS ken JO a saan a sakup ti paglintegan ti CSC.
Dagitoy ti innala ti PAGCOR a kas cook, waiter, purchaser, pantry aide, food attendant, steward, dishwasher, kitchen supervisor, ken busboy.
Nagpirmada iti kontrata iti PAGCOR iti fixed term, ngem mapabpabaro met laeng daytoy.
Blazers, inatiwda ti Red Lions; kasangoda ti Cardinals iti NCAA finals
Nagtrabahoda iti PAGCOR iti las-ud ti 17 a tawen.
Innayon ti SC a maibatay iti kasasaad ti annongenda, ti ranggoda iti organisasion, ti sueldoda, ken ti kontrata ti panagtrabahoda, saan a regular nga empleado ti PAGCOR dagiti maseknan a mangmangged.
Ngem binalakadan ti Korte Suprema ti PAGCOR ken dagiti kapadpadana nga ahensia a nupay adda karbenganda a mangontrata iti serbisio, kas sagudayen ti alagaden ti Civil Service, di rumbeng a mausar daytoy a mangmaltrato wenno mangabuso kadagiti mangmangged a JO wenno COS. (Benjamin Pulta/PNA//Lito Hilidon/Bannawag)
