"Dakkel a pannakaitantan" iti pananggun-od iti dekalidad nga edukasion ti pannakaanamong ti linteg a mangpaisardeng iti Mother Tongue a pagisuro manipud iti Kindergarten agingga iti Grado 3.
Daytoy ti kinuna ti Alliance of Concerned Teachers (ACT) Philippines ken ti Teachers’ Dignity Coalition (TDC) idinto nga indagadagda iti gobierno nga aturenda koma ti pagkurangan iti pannakaipatungpal ti Mother Tongue-Based Multilingual Education (MTB-MLE) program, imbes nga ilaksidda daytoy.
Kinuna ti TDC itay Oktubre 14 a saan a solusion ti pannakaamendar ti K to 12 Law ken pannakaisardeng ti mother tongue kas pagisuro manipud iti Kindergarten agingga iti Grado 3 a kas sagudayen ti Republic Act (RA) 12027.
Nupay bigbigen ti grupo a narigat nga ipatungpal ti MTB-MLE, kunada a saan a rumbeng a maipasardeng daytoy.
Blazers, inatiwda ti Red Lions; kasangoda ti Cardinals iti NCAA finals
Maulit-ulit nga impaganetget ti TDC a ti pudpudno a karit ket adda iti panangtaming kadagiti pagkurangan ti programa, nangruna kadagiti materiales, ortograpia, ken panagsanay dagiti mannursuro, a saan ket a ti pannakaipasardeng ti mother tongue.
Kinuna ni National Chaiperson ti TDC Benjo Basas nga imbes nga isardengda ti programa, masapul nga agkuti ti gobierno tapno maatur dagiti nasken a mapasayaat tapno matungpal ti panggepna a panagramaram ken iti pannakagun-od ti dekalidad nga edukasion.
Iti sabali a bangir, indagadag ti ACT ken ni Presidente Marcos a waswasenna koma ti RA 12027 ken impettengda a masapul a maisuro latta ti mother tongue. (Merlina Hernando-Malipot/Manila Bulletin//Lito Hilidon/Bannawag)
