Inyebkas ni Presidente Ferdinand Marcos Jr. (PBBM) a tarigagayanna ti naan-andur nga Asia-Pacific Region ket patienna a magun-od dayta babaen ti panagtitipon dagiti kapanunotan a maibinglay dagiti tumabuno iti 2024 Asia-Pacific Ministerial Conference on Disaster Risk Reduction (APMCDRR) a maangay iti Manila itoy a lawas.
Kinuna ni PBBM a masapul a maikabassit dagiti peggad ken pukaw a gapuanan ti didigra tapno masalakniban ti biag, pagbiagan, ken dagiti sanikua ti gimong ken ekonomia a mangpabpabileg iti maysa a pagilian.
Ni Presidente ti Marcos ti nangsangaili iti ministerial dinner para kadagiti timmabuno iti APMCDRR iti Malakanyang itay Oktubre 14, maysa nga aldaw sakbay a maluktan ita, Oktubre 15.
Ti APMCDRR ti namagtitipon kadagiti gobierno, intergovernmental, international, national, ken civil society organizations; ti pribado a sektor; siensia; akademia; ken dagiti maseknan a grupo tapno mapapardas ti idudur-as ti panangikabassit iti peggad a gapuanan dagiti didigra.
Blazers, inatiwda ti Red Lions; kasangoda ti Cardinals iti NCAA finals
Daytoy a komperensia ti kangrunaan a plataporma ti Asia ken Pasipiko tapno mabantayan, marepaso, ken mapasayaat ti panagtitinnulong a mangipatungpal iti Sendai Framework for Disaster Risk Reduction 2015-2030 iti rehion.
Panggep ti Sendai Framework for Disaster Risk Reduction 2015-2030 a magun-od ti pannakakissay dagiti peggad nga ibunga dagiti didigra ken dagiti mapukaw a biag, pagbiagan, ken salun-at ken ti ekonomiko, pisikal, sosial, kultural, ken nakaparsuaan a sanikua ti tao, negosio, kagimongan, ken pagilian iti masungad a 15 a tawen. (Argyll Cyrus Geducos/Manila Bulletin//Lito Hilidon/Bannawag)
