Linapdan dagiti kameng ti Bureau of Immigration (BI) ita nga aldaw, Oktubre 16, ti maysa a 32-ti-tawenna a Filipina a makalugan iti eroplano iti Ninoy Aquino International Airport (NAIA) kalpasan a natiliwanda a peke ti departure stamp daytoy a ginatangna iti PhP65,000.
Segun ken ni Commissioner ti BI Joel Anthony Viado, simmangpet ti biktima iti counter nga addaan iti pasaporte nga addaan ti peke a departure stamp, ket pinadasna a kinombinsir ti immigration officer a nalpasnan ti immigration departure procedure.
Saan nga imbutaktak ti BI ti kinaasino ti Filipina ken nayawaten daytoy iti sidong ti Inter-Agency Council Against Trafficking (IACAT) tapno matulongan ken maidarum dagiti recruiter-na.
Impudno ti biktima a PhP80,000 ti singsingiren kenkuana dagiti recruiter para iti peke a departure stamp, ngem tinawaranna daytoy iti PhP65,000. (Jeffrey Damicog/Manila Bulletin//Lito Hilidon/Bannawag)
