Kalpasan ti nasurok a maysa dekada, nagpatang manen ti Filipinas ken Malaysia para iti maika-8 a Philippines-Malaysia Joint Commission Meeting (JCM) tapno pagpatanganda ti panaggayyemda ken dadduma pay a parikut a pakaseknanda a dua.
Nagturong ni Sekretario ti Department of Foreign Affairs (DFA) Enrique Manalo iti Kuala Lumpur ita, Oktubre 16, gapu iti awis ni Foreign Minister ti Malaysia Dato' Seri Utama Haji Mohamad Bin Haji Hasan.
Segun iti DFA mangipaay ti 8th PH-MY JCM iti napateg a gundaway a mangrepaso iti panagdur-as ti panagtinnulong dagiti dua a pagilian, ta naangay ti naudi a JCM iti Manila idi 2011.
Dimmar-ay pay ni Manalo iti diplomatic reception a sinangaili ti Embahada ti Filipinas iti Malaysia tapno rambakanda ti 60 a tawen a panaggayyem dagiti dua a pagilian. (Raymund Antonio/Manila Bulletin//Lito Hilidon/Bannawag)
