Indawat ni Diputado ti maikadua a distrito ti Cagayan de Oro City Rufus Rodriguez nga idonar koma ti Estados Unidos (US) ti dandanin ma-decommission a warship-da tapno mausar manen daytoy ti gobierno ti Filipinas iti West Philippine Sea (WPS).
Ti bapor a pakigubat a USS Philippine Sea, a naikeddeng a ma-deactivate inton 2025, ti kunkuna ni Rodriguez.
Kiniddaw daytoy ni Rodriguez babaen dagiti suratna kada State Secretary Anthony Blinken, Defense Secretary Lloyd James Austin III, ken US Ambassador iti Manila MaryKay Carlson.
Kinuna ni Rodriguez itay Oktubre 15 a no maidonar iti Filipinas ti USS Philippine Sea--a mabalin a tarimaanen pay ti gobierno ti US -- mabalin nga usaren ti gobierno ti Filipinas daytoy a mangpadakkel iti Navy ken coast guard-na nga agpatrulia kadagiti isla ti pagilian, agraman iti WPS.
Blazers, inatiwda ti Red Lions; kasangoda ti Cardinals iti NCAA finals
Ti barko a pakigubat ti US ket maysa a Flight II Ticonderoga-class guided missile cruiser nga ar-aramaten ti US Navy. Nakomision daytoy idi Marso 18, 1989 ket manamnama a "maigarahen" daytoy iti Oktubre iti umay a tawen.
Naipanagan ti USS Philippine Sea iti "Battle of the Philippine Sea" idi Maikadua a Gubat iti Sangalubongan.
Gapu iti historikal a pakasaritaan ti bapor ken ti naganna (USS Philippine Sea) maitutop ken mainaig iti agdama a parikut iti kalintegan ti Filipinas (WPS) a karkariten ti China, kiniddaw ni Rodriguez a sapay koma ta maidonar ti USS Philippine Sea iti Filipinas, tapno mapasingkedan ti natibker a panaggayyem ti Estados Unidos ken Filipinas. (Ellson Quismorio/Manila Bulletin//Lito Hilidon/Bannawag)
