Agsagsagana ti Makabayan Coalition a mangidatag iti kaso ti diskualipikasion iti Commission on Elections (Comelec) kontra kadagiti kandidato iti nasional a pagakman iti gobierno a paset dagiti makunkuna a "political dynasty."
Kinuna ni dati a diputado ken first nominee ti ACT Teachers Party-list Antonio Tinio a ti panggepda a panangipila ket paset ti sapatada a gibusanda ti political dynasty.
Kinuna ni Tinio a nalawag nga iparit ti 1987 Konstitusion dagiti political dynasty, ket ti termino a political dynasty, nailawlawag iti Republic Act (RA) No. 10742, wenno iti Sangguniang Kabataan (SK) Reform Act.
Iti Section 10 ti RA 10742, dakamatenna dagiti kualipikasion ti maysa nga opisial ti SK a masapul a "saanda a kabagian iti second civil degree of consanguinity or affinity ti asinoman a nabotosan nga opisial iti nailian a gobierno wenno ti asino man a nabotosan nga opisial iti rehion, probinsia, siudad, munisipio, wenno barangay, iti lugar a kayatna a pakabotosan." (Dexter Barro II/Manila Bulletin//Lito Hilidon/Bannawag)
