Maysa manen a petision ti naipila iti Korte Suprema (SC) ita, Oktubre 16, a mangkuestion no maitunos iti Konstitusion ti pannakayalis ti PhP89.9 a bilion a sobra a pondo ti Philippine Health Insurance Corporation (PhilHealth) iti National Treasury.
Iti daytoy a gundaway, nagpetision ti 1SAMBAYAN Coalition, kameng ti University of the Philippines Law Class 1975, Senior for Seniors Association, Inc., Kidney Foundation of the Philippines, ken dadduma pay a pribado a tattao.
Kiniddawda iti SC a mangipaulog iti temporary restraining order (TRO) a manglapped iti Department of Finance a mangyalis iti pondo ti PhilHealth.
Dinakamatda ti report nga impakaammo ni Sekretario ti Department of Finance (DOF) Ralph G. Recto a ti PhP30 a bilion a pondo ti PhilHealth ket mayakar iti National treasury ita nga aldaw, Oktubre 16.
Blazers, inatiwda ti Red Lions; kasangoda ti Cardinals iti NCAA finals
Saan a nangipaulog ti SC iti TRO a kiniddaw dagiti dua nga immuna a nagipila iti petision. Apaman a naawat ti SC dagiti komento dagiti agsumbangir a partido, naikeddeng ti oral arguments inton Enero 14, 2025.
Nakuestionar met iti baro a petision dagiti probision iti Paragraph 1(d), Chapter XLIII of Republic Act No. 11975, the General Appropriations Act of 2024, ken Department of Finance (DOF) Circular 003-2024. (Rey G. Panaligan/Manila Bulletin//Lito Hilidon/Bannawag)
