Inulit ti Makabayan Coalition ti pananggutigotda iti administrasion ni Marcos a palubosanna ti Filipinas a tumulong iti imbestigasion nga iwayat ti International Criminal Court (ICC) iti maatap nga extrajudicial killings (EJKs) iti war on drugs ni dati a pangulo Rodrigo Duterte.
Kiniddaw ni Diputado ti ACT Teachers Party-list France Castro a deputy minority leader iti Kamara, ti pannakitinnulong ti gobierno iti ICC kalpasan ti kaudian a naibutaktak iti imbestigasion ti Quad-committee (quad-comm) kadagiti EJK.
Patien ni Castro a mabalin nga aramaten dagiti datos a nakalapda iti imbestigasion ti Kamara tapno a mapatalgedan ti pattapattada a nagbalin ti EJK a polisia ti gobierno idi panawen ti dati a presidente.
Segun kadagiti human rights organization, agarup 30,000 a tao ti napapatay iti war on drugs. (Dexter Barro II/Manila Bulletin//Lito Hilidon/Bannawag)
