Saan a mailisi ni dati a Presidente Rodrigo R. Duterte iti pannakaimbestigar manen dagiti di nasolbar a pammapatay a napasamak kabayatan ti panagturayna, inwaragawag ni Department of Justice (DOJ) Secretary Jesus Crispin C. Remulla ita a Huebes, Okt. 17.
“Saantayo a palubosan a di masolbar dagitoy a kaso," kinuna ni Remula, iti pannakiuman kenkuana dagiti agiwarwarnak. Innayonna a "no adda dagiti tattao a mayat nga agtestigo ken mangted iti ebidensia, maluktan manen dagitoy a kaso, ta awan ti talna no awan ti hustisia.”
"Awan ti asino man a mailaksid. Ti napateg, masapul nga agbayad ti asino man a nakaaramid iti krimen,” impaganetget ni Remulla.
Inwaragawag ni Remulla ti biang ti DOJ kalpasan nga impasingked ti Malakanyang ti suporta daytoy iti pannakaimbestigar manen dagiti mapapati a nabaybay-anen a kaso ti pammapatay mainaig iti gubat kontra droga nga inwayat ti administrasion ni Duterte. (Jeffrey Damicog/MANILA BULLETIN)
