Imbestigaren ngarud ni Senador Ronald "Bato" dela Rosa ti bagbagina?
Kasta ti saludsod--ken panangsupiat da Gabriela Party-list Rep. Arlene Brosas ken Santa Rosa City lone district Rep. Dan Fernandez iti plano ti Senado a mangisayangkat iti parallel investigation iti kampania kontra ilegal a droga nga inwayat ni dati a presidente Rodrigo Duterte.
Maipadpadamag nga isayangkat ti Senate Committee on Public Order and Dangerous Drugs nga idauluan ni dela Rosa ti nasao nga imbestigasion--nga isaysayangkaten ti quad-committee (quad-comm) ti Kamara manipud pay idi Agosto.
"Asino ti imbestigarenna, bagbagina? Daytoy a plano nga imbestigasion ni Sen. Bato, a mismo a maak-akusaran nga addaan iti dakkel a pannakanaigna iti gubat kontra droga ni Duterte, ket nalawag a maysa a biased attempt a mangdalus iti pannakainaigda," kinuna ni Brosas iti maysa nga statement ita a Huebes, Okt. 17.
Kiddaw ni Quiboloy a Medical Furlough, inanamongan ti Pasig RTC
Innayonna a "saan a rebbengna a masayang ti pondo ti publiko kadagiti panagpalutpot a naplano a pangwaswas iti bagbagi imbes a maibuksilan ti kinapudno."
“Delicadeza koma lattan ti pagturayen ni Sen. Bato. Para kaniak, saan a pulos a maitutop nga isuna, kas chief enforcer ti drug war, nga idauluanna ti imbestigasion kadagiti mismo nga operasion a dinisenio ken impatungpalna,” kinuna met ni Fernandez.
“Kas arkitekto ti gubat kontra droga, agtinnag nga imbestigaren met laeng ni Sen. Bato ti bagbagina. Daytoy ti mangdadael iti integridad ken kinaobhetibo ti ania man a findings a resulta daytoy nga imbestigasion,” innayon pay ni Fernandez. (Ellson Quismorio/MANILA BULLETIN)
