Masapul a kankanayon a saganaan dagiti Filipino ti "The Big One" wenno ti mapagam-amkan a napigsa a ginggined a mabalin a mapasamak iti Metro Manila ken kabangibangna a probprobinsia kas iti Rizal ken Bulacan iti ania man nga oras, segun ken ni Sekretario ti Department of Science and Technology (DOST) Renato Solidum Jr. itay Oktubre 17.
Iti naangay nga Asia-Pacific Ministerial Conference on Disaster Risk Reduction (APMCDRR) idi Oktubre 16, impakdaar ni dati nga executive director ti National Disaster Risk Reduction and Management Council (NDRRMC) ken dati a daulo ti Office of Civil Defense (OCD) Alexander Pama nga agarup 47,000 a tattao ti mabalin a bilang ti casualties no dumteng ti "Big One" itoy a tawen. Maibatay daytoy iti datos ti Philippine Institute of Volcanology and Seismology (Phivolcs).
Ti "The Big One" a makunkuna ket 'tay dakkel a ginggined a mabalin a gubuayen ti panaggaraw ti West Valley Fault a dumanon iti daya a paset ti Metro Manila ken kabangibang a probprobinsia.
Segun kadagiti eksperto, mabalin a dumanon iti 7.2 wenno nangatngato pay ti kapigsa ti dayyeg a mabalin nga agtungpal iti nasaknap a pannakadadael, nangruna kadagiti siudad ken ili a dakkel ti populasionda.
Blazers, inatiwda ti Red Lions; kasangoda ti Cardinals iti NCAA finals
Kinuna ni Solidum a no aggapu iti West Valley Fault ti ginggined, pinullo a ribu a tattao ti matay manipud iti Metro Manila ken iti kabangibang a lugar kas iti Bulacan, Rizal, Cavite, Laguna, ken paset ti Pampanga. Dayta ti pattapattada no awan ti aramidenda a panagsagana.
Imbalakad ni Solidum a masapul a di sardayan dagiti Filipino ti panagsaganada iti dakkel a ginggined, ta adu ti madadael ken maipatli a biag no mapasamak daytoy. (Jel Santos/Manila Bulletin//Lito Hilidon)
