Impakaammo ti Department of Health (DOH) ita, Oktubre 18, nga immadu ti kaso ti leptospirosis iti entero a pagilian, ket pinakdaaranda ti publiko nga agpadoktor, nangruna no kalkalpas ti layus.
Segun iti DOH, manipud Okt. 5 (Morbidity Week 40), agdagup iti 5,835 ti kaso ti leptospirosis. Ipakpakita daytoy a datos ti 16 a porsiento a panagadu manipud iti 5,050 a nai-report a kaso iti isu met laeng a panawen idi 2023.
Kinuna ti DOH nga immadu ti bilang ti kaso iti amin a rehion iti las-ud ti tallo agingga uppat a lawas, malaksid iti Central Visayas, Northern Mindanao, Soccsksargen, ken Caraga.
Imbalakad ni Sekretario ti DOH Teodoro J. Herbosa iti publiko a liklikan ti danum ti layus agingga a mabalin, ken agpakonsulta a dagus, uray no awan ti sugat wenno sintoma, ta kinunana a nasaysayaat ti agbalin a nasalun-at kalpasan ti isasarungkar iti health center ngem ti maipan iti ospital nga agpa-dialysis gapu iti leptospirosis. (Merlina Hernando-Malipot/Manila Bulletin//Lito Hilidon/Bannawag)
