Pinirmaanen ni Presidente Ferdinand Marcos Jr. (PBBM) ti Republic Act (RA) 12028 wenno ti Academic Recovery and Accessible Learning (ARAL) Act a mangpadaras iti learning recovery dagiti estudiante ken mangtaming iti giwang a pinakaro ti angol ti Covid-19.
Kinuna ni PBBM iti Malakanyang itay Oktubre 18, a napateg nga addang ti baro a linteg iti panangbigbig ken pannakataming dagiti nakaro ken nauneg a karit a sagsagrapen ti sektor ti edukasion.
Maysa a libre a nailian a learning intervention program ti ARAL Program, ket panggepna a tulongan dagiti adalan a marigatan a makaragpat iti kasapulan a gradoda. Maidiaya daytoy kadagiti sumrek manen iti eskuela kalpasan ti panagsardengda; kadagiti marigatan iti panagbasa, matematika, ken siensia; ken kadagiti marigatan iti eksaminasion.
Idauluan ti Department of Education (DepEd) ti ARAL Program a mangala kadagiti mannursuro, para-teachers, ken pre-service a mannursuro wenno kadagiti estudiante a naka-enroll iti teacher degree program nga ituktukon ti Teacher Education Institutions. (Argyll Cyrus Geducos/Manila Bulletin//Lito Hilidon/Bannawag)
