Iti biang ni Senate President Francis "Chiz" Escudero, nasaysayaat no saan a da Senador Ronald "Bato" Dela Rosa ken Christopher "Bong" Go ti mangidaulo iti panangimbestigar ti Senado iti drug war ni dati a presidente Rodrigo Duterte.
Kinuna ni Escudero itay Oktubre 17 a binalakadannan dagiti dua a senador ta amangan no saan a kayat ti dadduma a senador, kasta met ti publiko, nga isuda a mismo ti mangidaulo iti imbestigasion kontra iti drug war, tapno maliklikan ti atap nga addaanda kadagiti personal a motibo ket agbanag a saan a patas ken addaan panangidumduma ti iwayatda nga imbestigasion.
Insingasing ni Senador Risa Hontiveros a mabukel koma ti Senate Committee of the Whole a mangiwayat iti imbestigasion iti drug war.
Ngem segun ken ni Escudero, mabalin a sabali a komite ti mangisayangkat iti imbestigasion, malaksid iti Senate Committee on Public Order and Dangerous Drugs nga idadauluan ni Dela Rosa. (Dhel Nazario/Manila Bulletin/Lito Hilidon/Bannawag)
