Ti Senate Committee on Accountability of Public Officers and Investigations, nga am-ammo a kas Blue-Ribbon Committee, ti mabalin a mangtaming iti singasing a pannakaimbestigar iti drug war ni dati a presidente Rodrigo Duterte, segun ken ni Senate President Francis "Chiz" Escudero ita, Oktubre 18.
Inlawlawag ni Escudero a ti laeng Blue Ribbon Committee ti mabalin nga aggunay a mangtaming iti isyu, idinto a naka-recess pay laeng ti Kongreso, ngem mayallatiw met laeng iti Committee on Justice kalpasanna.
Ni Senador Pia Cayetano ti daulo ti Blue-Ribbon Committee, ket ni Senate Minority Leader Aquilino "Koko" Pimentel III ti daulo ti Senate Committee on Justice.
Kinuna ni Escudero a naituding a makisarita kada Senador Ronald Dela Rosa ken Christopher Lawrence Go tapno damagenna no kayatda a rugian ti imbestigasion ita, wenno inton maluktan manen ti regular session. (Wilnard Bacelonia/PNA//Lito Hilidon/Bannawag)
