Impila ti Coalition Alyansa ng Nagkakaisang Mamamayan (ANIM) ti petision iti Commission on Elections (Comelec) ita, Oktubre 18, a mangkidkiddaw iti pannakadiskualipikar dagiti agngayangay a politiko a da dati a presidente Rodrigo Duterte, Matthew Marcos Manotoc, House Speaker Martin Romualdez, Senador Cynthia Villar ken ni Bise Gobernador ti Catanduanes Peter Cua.
Kiniddaw dagiti nagpetision nga indauluan ni Bishop Gerardo Alminanza a maikkanda koma iti gundaway a mangidatag iti argumentoda iti sanguanan ti Commission En Banc.
Ti ANIM ket maysa koalision dagiti organisasion manipud iti innem a sektor nga idauluan dagiti retirado a senior military officers manipud iti Armed Forces of the Philippines (AFP), Philippine National Police (PNP), uniformed personnel, obispo ken dagiti dadduma pay a lider dagiti faith-based a gunglo.
Dinakamatda ti "nalawag a panggep" dagiti nangbukel iti 1987 Konstitusion kadagiti tallo a probision a kontra-dinastia, kasta met dagiti nabayagen a naipasdek a pagannurotan, nga amin a probision ti Konstitusion ket maipagarup a self-executory, ket no adda panagduadua, masapul a marisut dayta a maitunos iti Constitutional presumption.
Blazers, inatiwda ti Red Lions; kasangoda ti Cardinals iti NCAA finals
Kinuna ni Abogado Alex Lacson, a co-convenor ti ANIM, natibker ti pagbatbatayanda iti indatagda a petision. Binabalawna met ti aramid dagiti political clan nga agsisinnukat ti posision apaman a nagpason ti terminoda. (Dhel Nazario/Manila Bulletin//Lito Hilidon/Bannawag)
