Idi pay laeng 2021, pinasingkedanen ti Commission on Human Rights (CHR) ti konsepto a “pammadayaw (awards), gunggona (rewards), pammigbig (recognition)” kadagiti polis iti pannakapapatay dagiti maipagarup a nairaman iti ilegal a droga.
Iti kallabes, imbutaktak ni retirado a police colonel Royina Garma bayat ti panagimbestigar ti Quad-Committee ti Kamara ti "reward system" iti pannakaipatungpal dagiti kampania kontra droga ti napalabas nga administrasion.
Gapu iti impalgak ni Garma, agtalek ti CHR iti pagtungpalan ti panagbista ti Quad-Comm tapno maipaay ti hustisia kadagiti biktima ti extrajudicial killings (EJKs).
Impanamnama ti CHR, a maysa a resource agency iti panangbista ti Quad-Comm, ti naan-anay a suporta ken pannakitinnulongna. (Rey G. Panaligan/Manila Bulletin/Lito Hilidon/Bannawag)
