Kalpasan ti walo a marathon hearings, nakasaganan ti House Quad-committee (quad-comm) a mangiparang iti partial committee report kadagiti naduktalanna mainaig iti mapapati nga extrajudicial killings (EJK) iti napalabas nga administrasion ni Duterte.
Kinuna ni Diputado ti Surigao del Norte 2nd district Robert Ace Barbers, ti sapasap a daulo ti quad-comm, a lepleppasendan ti committee report, ket mabalin nga usaren daytoy dagiti maseknan nga ahensia kas iti Department of Justice (DOJ), National Bureau of Investigation (NBI), ken ti Office of the Ombudsman iti panangyulida iti darum kontra kadagiti maatap a naglabsing iti linteg a tattao.
Nupay suksukimaten ti Quad-comm dagiti nadumaduma pay nga isyu kas iti POGO (Philippine Offshore Gaming Operators), umdas dagiti naurnongda nga apidabit ken testimonia manipud iti isyu ti EJK tapno makabukelda uray partial report pay laeng.
Kinuna ni Barbers nga agtuloy latta ti panangbista ti komite uray mairuaren ti partial committee report. (Ellson Quismorio/Manila Bulletin//Lito Hilidon/Bannawag)
