Inruar ti Metropolitan Manila Development Authority (MMDA) ti “Oplan Undas 2024” idi Oktubre 18, para iti naannayas ken naurnos a panangrambak iti All Saints’ Day ken ti All Souls’ Day.
Kinuna ni daulo ti MMDA Don Artes a 1,257 a personnel manipud iti Traffic Discipline Office, Special Operations Group-Strike Force, Metro Parkways Clearing Group, ken Road Emergency Group ti maipan kadagiti kangrunaan a lugar kas iti bus terminal, kamposanto, ken dadakkel a kalsada para iti Oplan Undas 2024.
Malaksid iti daytoy, matudingan dagiti security personnel manipud iti Philippine National Police (PNP) a mangnayon iti puersa ti MMDA.
Kiniddaw ni Artes kadagiti amin nga ahensia nga agsaganada iti manamnama a yaadu ti pasahero nga agawid kadagiti probinsia babaen ti panangtimonda iti trapiko kadagiti kangrunaan a kalsada a kumamang kadagiti kamposanto iti Kamanilaan. (Martin Sadongdong/Manila Bulletin//Lito Hilidon/Bannawag)
