Kinompirmar ti grupo a Hamas itay Oktubre 18 ti pannakapapatay ti liderda a ni Yahya Sinwar iti ima dagiti puersa ti Israel iti Gaza. Impaganetget met ti militante a grupo ti takderda a dagiti hostage-da manipud Israel makatawenen ti napalabas ket saan a mawayawayaan agingga nga adda maipatungpal a cease-fire iti Gaza ken pumanaw dagiti buyot ti Israel.
"Natay ni Sinwar a makirangranget iti kabusor agingga iti maudi a kanito ti biagna," kinuna ni Khalil al-Hayya, a nagserbi a katulongan ni Sinwar ken nakabase iti Qatar ken nangibagi iti Hamas iti sumagmamano a panagsasarita tapno adda maipatungpal a cease-fire.
Insapata ti Israel a dadaelenna ti Hamas iti politika iti Gaza, ket ti panangpapatay ken ni Sinwar ti prioridad ti Israeli military. Ipakpakita dagiti ladawan nga ala dagiti buyot ti Israel ti bangkay ti maysa a lalaki a mapapati a ni Sinwar, a nagaburan kadagiti rebba ken adda dakkel a sugat iti ulona.
Kinuna ni Prime Minister ti Israel Benjamin Netanyahu a saan pay a naggibus ti gubat.
Resolusion ti UN nga agkidkiddaw ti ceasefire iti Gaza, saan a pinaboran ti Estados Unidos
Ngem adu kadagiti pagilian a kaaliado ti Israel ti manginanama a ti pannakatay ni Sinwar ti mangitunda iti panagpatingga ti gubat. (Associated Press/Manila Bulletin//Lito Hilidon/Bannawag)
