Agdagup iti 359 nga artist ti nakisalip iti Manila Bulletin Sketchfest 2024 a naangay iti Mall of Asia Music Hall iti Pasay City itay Oktubre 20.

Addaan daytoy iti tema nga “Alamat: Mythical stories and legends of the Philippines” a mangitampok iti kinalaing dagiti Filipino nga agdibuho.

Segun ken ni brand manager ti Manila Bulletin Leslie Leshen Araujo, maika-13 a tawenna itan ti Sketchfest a nangrugi idi 2011 a nakisalipan dagiti 200 nga artist manipud iti nadumaduma a paset ti pagilian.

Adda tallo a kategoria iti Sketchfest: on-the-spot, digital, ken exhibition.

Nasional

Australiano, 2 pay, natiliw gapu iti bogus a doliar

Iti on-the-spot category, umawat iti premio a PhP30,000 (umuna a gunggona); PhP20,000 (maikadua a gunggona); ken PhP10,000 (maikatlo a gungona) dagiti senior participants. Maikkan iti premio a PhP15,000 (umuna a gunggona); PhP10,000 (maikadua a gunggona); ken PhP5,000 (maikatlo a gunggona) dagiti junior participants.

Umawat iti PhP30,000 ti mangyalat iti umuna a gunggona; PhP20,000 para iti maikadua a gunggona, ken PhP10,000 ti maikatlo a gunggona iti digital category.

Para iti exhibition category, PhP50,000 ti alaen ti umuna a gunggona, PhP30,000 para iti maikadua a gunggona, ken PhP20,000 ti maipaay iti maikatlo a gunggona.

Maipaayan met iti PhP2,000 dagiti 17 a makaala iti consolation prize. (Jean Fernando/Manila Bulletin//Lito Hilidon/Bannawag)