Indauluan ni Sekretario ti Department of National Defense (DND) Gilberto Teodoro Jr. ti pannakalagip iti maika-80 nga anibersario ti Leyte Gulf Landings itay Oktubre 20, a binuyogan ti panangipasingked ti gobierno iti pannakasalaknib ti seguridad ti pagilian, natalged a teritorio, ken panagwaywayas nga inrupir dagiti beterano idi Maikadua a Gubat iti Sangalubongan (WWII).
Naipabuya ti historikal nga isasanglad ni Heneral Douglas MacArthur ti Estados Unidos (US) iti Palo, Leyte idi Oktubre 20, 1944 a kaduana da Presidente Sergio Osmeña ken Hen. Carlos P. Romulo.
Daytoy ti tanda ti panagsublida iti Filipinas kalpasan ti panaglibas ken ipapanawda iti Corregidor idi 1942 idi sunsonen idan dagiti Hapones -- a nangibalikasan ni MacArthur iti, “I shall return” -- tapno mapan iti Australia nga agukkon iti puersa a mangwayawaya iti Manila ken iti pagilian.
Ti isasangpet ni MacArthur ket saan laeng a panangtungpal iti karina kadagiti Filipino, no di ket nangirugi iti Gubat iti Leyte Gulf iti invasion dagiti Allied Forces iti Leyte tapno manipud sadiay, mawayawayaan ti pagilian manipud kadagiti nangsakup a Hapones. Daytoy ti maibilang a kadakkelan a gubat iti baybay iti WW II gapu ta aganay a 200,000 a naval personnel ti nairaman ken sinaknapna ti 100,000 a milia kuadrado ti baybay.
Australiano, 2 pay, natiliw gapu iti bogus a doliar
Iti seremonia a naangay iti Palo, Leyte, pinadayawan ni Teodoro dagiti beterano ti WWII gapu iti panagsakripisioda tapno mawayawayaan ti pagilian manipud iti Japon.
Dimmar-ay met iti seremonia da House Speaker Ferdinand Martin Romualdez, Embahador Hae Kyung Yu ti Australia ken Endo Kazuya ti Japan, US Maj. Gen. Matthew McFarlane, agraman ni Gobernador ti Leyte Carlos Jericho Petilla ken ti Mayor ti Leyte a ni Remedios Petilla. (Martin Sadongdong/Manila Bulletin//Lito Hilidon/Bannawag)
