Inanamongan dagiti defense ministers ti Japan, UK, ken Italy a papardasenda ti pannakaaramid ti kabaruanan a fighter jet, ket inwaragawagda a maipasdek ti trilateral nga organisasion ti gobierno iti ngudo ti tawen tapno a makitinnulongda kadagiti partido nga agar-aramid iti eroplano, kinuna ti opisial ti Japan itay Oktubre 20.
Nagtutulag dagiti tallo a pagilian idi 2022 a sangsangkamaysada a mangpataud iti baro a combat aircraft a maipakat inton 2035, iti sidong ti Global Combat Air Program (GCAP) tapno mapapigsa ti panagtitinnulongda maibusor iti dumakdakkel a pangta ti China, Russia ken North Korea.
Dagiti sumarsaruno a henerasion ti stealth fighter jet ti mangsukat iti agretiron nga F-2 ti Japan a nagtinnulonganda iti US nga inaramid, ken dagiti Eurofighter Typhoons, a napataud babaen ti pannakitinnulong ti UK, Italy, Spain, ken Germany.
Kinuna ni Defense Minister ti Japan Gen. Nakatani itay Oktubre 20 a kalpasan ti pannakipatangna kada John Healey (Defense Minister ti UK) ken Guido Crosetto (Defense Minister ti Italy), maipasdek ti maysa a gunglo a maawagan ti GCAP International Government Organization (GIGO) iti ngudo daytoy a tawen tapno mangimaton iti pannakabukel ti eroplano. (Associated Press/Manila Bulletin//Lito Hilidon/Bannawag)
