Dinayaw ni Diputado ti Camarines Sur 2nd district LRay Villafuerte ti pannakairuar ti implementing rules and regulations (IRR) ti Republic Act (RA) No. 11996, wenno ti "Eddie Garcia Act” of 2024, a mangitandudo iti nainget a panangsalaknib iti pagtrabahuan ken nasaysayaat a sueldo dagiti gagangay nga agtrabaho iti pelikula ken telebision.
Mairaman iti linteg dagiti independent contractors a mangaramid iti production works ken dadduma pay a serbisio kas iti panangiwaras ken panangiparang kadagiti linaon. Mairaman met dagiti out of town a panagshuting ken/wenno lock-in production work a masapul nga agtalinaedda iti lugar a pagshutinganda iti las-ud ti 24 nga oras wenno iti sumagmamano nga aldaw wenno bulan.
Idi Mayo, inanamongan ni Presidente Marcos Jr. ti RA No.11996, ti pinal a bersion nga inanamongan ti Kamara (House Bill or HB No.1270) a buklen ti innem a kapadpadana a gakat, agraman ti lead measure HB No.1270 a binukel ni Villafuerte.
Kinuna ni Villafuerte a naintiempuan ti manamnama a pannakaipatungpal ti RA No.11996 ta impaulog ni Presidente Marcos Jr. idi Oktubre 5 ti Executive Order (EO) No. 70 a mangpadur-as iti industria ti pelikula ken mangpatibker iti Film Academy of the Philippines (FAP). (Ellson Quismorio/Manila Bulletin//Lito Hilidon/Bannawag)
