Kinemmeg dagiti kameng ti National Bureau of Investigation (NBI) ti maysa a babai iti Ninoy Aquino International Airport (NAIA) gapu iti maatap a pannakairamanna iti pannakaibiahe kadagiti Filipina iti abroad tapno mapagbalin a surrogate mother (mangisikog iti agbalin nga anak ti sabali).
Binigbig ti NBI ti suspek a ni Freezle Rose Balando a nasallabat dagiti immigration officers a kaduana ti tallo a Filipina idi Oktubre 13 iti NAIA sakbay a makaluganda iti eroplano a mapan iti Thailand.
Kinuna ti NBI ita, Oktubre 21, kinemmegda ni Balondo gapu iti panaglabsing iti Trafficking in Persons under RA 9208 (Republic Act 9208 wenno ti Anti-Trafficking in Persons Act of 2003) kas inamendaran ti RA 10364 ken RA 11862.
Segun iti NBI, imbaga dagiti tallo a kakadua ni Balondo a sangabunggoyda nga aggagayyem a mapan agpasiar iti Bangkok, Thailand iti las-ud ti innem nga aldaw, ken kinuna dagitoy nga agtrabtrabahoda iti maysa a kompania a managan TTEC kas Customer Service Representatives.
Australiano, 2 pay, natiliw gapu iti bogus a doliar
Ngem iti maikadua nga inspeksion, inaklon ti dua a pasahero a saanda nga empleado ti TTEC ket mapanda iti Thailand tapno agbalin a surrogate mother babaen ti in-vitro fertilization (IVF) procedure a kasukat ti US$8,000 agingga US$10,000.
Nangrugi ti imbestigasion ti Department of Justice (DOJ) mainaig iti surrogacy scheme kalpasan a na-rescue ti 20 a Filipina, 13 kadakuada ti masikog, iti Cambodia manipud iti sindikato a mangipuslit kadagiti ganggannaet a babbai tapno agbalin a surrogate mother uray no maiparit ti surrogacy iti pagilian. (Jeffrey Damicog/Manila Bulletin//Lito Hilidon/Bannawag)
