Binabalaw ni Diputado ti Davao del Norte 1st district Pantaleon Alvarez dagiti kameng ti Kamara iti "kinamanaginsisingpetda" a mangim-imbestigar iti drug war ni dati a Presidente Rodrigo Duterte.
Kinuna ni Diputadoo Alvarez a nasinged a kaaliado ni Duterte itay Oktubre 22, nga adda met sungsungbatan dagiti kameng ti Kamara iti panagayus ti dara iti drug war ti naglabas nga administrasion.
Kinuna ni Alvarez a saan a mapasamak ti drug war no saan a sinuportaran dagiti umili ken kinanunongan iti 17th ken 18th Congress. Ket kaaduan a kameng ti Kamara iti daydi a panawen ti adda pay laeng iti 19th Congress.
Impaganetget ni Alvarez a no "nagbasol" ni dati a Presidente Duterte, kaipapananna laeng a nagbasol met ti Kongreso.
Australiano, 2 pay, natiliw gapu iti bogus a doliar
Impasingked ni Alvarez a saan laeng a ni Duterte ti nagbasol iti nagayus a dara iti drug war, no di ket pay dagiti mammanday-linteg a nagimbubulsek idi adu a pammapatay.
Kinuna ni Alvarez a saan laeng a pinonduan ti Kongreso ti drug war, no di ket pinagbalinna daytoy a linteg. (Dexter Barro II/Manila Bulletin//Lito Hilidon/Bannawag)
