Nakaawat ti Quad-Committee ti Kamara (quad-comm) iti mensahe manipud iti abogado ni dati a Presidente Rodrigo Duterte a saan a makadar-ay daytoy iti naituding a bista ti komite ita nga aldaw, Oktubre 22.
Nagsurat ti abogado ni Duterte a ni Atty. Martin Delgra III ken ni Diputado ti Surigao del Norte 2nd district Robert Ace Barbers a daulo ti quad-comm, tapno ipakaammona saan a makadar-ay ni Duterte.
Segun iti surat, malaksid iti short notice a naited kenkuana, saan a nasayaat ti riknana ken kasapulanna ti aginana gapu iti edadna ken gapu kadagiti sumagmamano a dinar-ayanna a pasken.
Babaen ti surat, kiniddaw ni Duterte a maitantan ti idadar-ayna iti quad-comm hearing; ketdi, mabalinnanton ti tumabuno kalpasan ti Nobiembre 1. (Ellson Quismorio/Manila Bulletin//Lito Hilidon/Bannawag)
