Pinatgan ti Pasig City Regional Trial Court Branch 159 ti kiddaw ti Senado nga idadar-ay ni daulo ti Kingdom of Jesus Christ (KOJC) Apollo Quiboloy iti imbestigasion ti Committee on Women and Children inton Oktubre 23.
Nakapupok ita ni Quiboloy iti Pasig City Jail. Binilin ti korte ti Pasig City Jail ken ti Bureau of Jail Management and Penology (BJMP) iti Brgy. Pinagbuhatan, Pasig City ken ti hepe ti PNP Custodial Center iti Camp Crame, Quezon City a kuyogenda ni Quiboloy.
Pinalubosan met ti korte a dumar-ay iti imbestigasion da Jackielyn Wong Roy, Cresente Chavez Canada alias Enteng, Ingrid Chavez Canada, Paulene Chavez Canada, ken Sylvia Calija Cemanes.
Kinuna ni Senate President Francis “Chiz” Escudero nga ipaay ti Senado ti umdas a seguridad tapno maipasigurado ti kinatalged dagiti resource person a dumar-ay iti bista ti Senado. (Hannah L. Torregoza/Manila Bulletin//Lito Hilidon/Bannawag)
