Angayen ti Department of Agriculture-National Tobacco Administration dagiti banag a pakaseknan ti lokal nga industria ti tabako iti agdua nga aldaw nga International Tobacco Agricultural Summit inton bigat, Okt. 23, agingga iti Okt. 24, iti Siudad ti Quezon.
Mapagsasaritaan iti umuna nga aldaw no kasano a mapadur-as pay ti industria ti tabako ken mapatalged ti puestona iti sangalubongan a merkado. Iti maikadua nga aldaw, mataming met dagiti ilegal nga aramid a mangimammameg iti industria ken no kasano a marisut dagitoy.
Mapan iti agingga iti PhP100 a bilion ti pukaw ti gobierno iti tinawen gapu kadagiti ilegal a panagkomersio iti tabako.
Napateg a mataming dagiti pakaseknan ti industria gapu ta mapan a 2.2 a milion a Filipino ti agsadsadag ti panagbiagda iti tabako, mairaman ditoy ti nasurok a 430,000 nga agmulmula iti tabako, dagiti kakaduada iti talon, ken dagiti pamiliada.
Blazers, inatiwda ti Red Lions; kasangoda ti Cardinals iti NCAA finals
Manamnama a dumar-ay iti panagtutungtong da Budget and Management Secretary Amenah Pangandaman, Internal Revenue Commissioner Romeo Lumagui Jr., Jericho Nograles, president of the Philippine Tobacco Institute, ken Agriculture Undersecretary Deogracias Victor B. Savellano.
Daytoy a panagtutungtong ti mangipakita no kasano ti kinapateg ti industria iti ekonomia, kas kinuna ni NTA Administrator Belinda Sanchez. (Freddie Lazaro/Manila Bulletin// Cles B. Rambaud/Bannawag)
