Naibayogen ti Tropical Cyclone Wind Signal (TCWS) No. 2 iti Catanduanes, idinto nga addan iti Signal No. 1 ti Metro Manila ken ti dadduma pay a lugar bayat nga umas-asideg ni Bagyo Kristine (internasional a nagan "Trami"), segun iti Philippine Atmospheric, Geophysical and Astronomical Services Administration (PAGASA).
Maibatay iti kaudian a pakaammo ti PAGASA, naibayog ti Signal No. 1 iti Metro Manila, Ilocos Norte, Ilocos Sur, La Union, Pangasinan, Apayao, Kalinga, Abra, Mountain Province, Ifugao, Benguet, Cagayan (agraman Babuyan Islands), Isabela, Quirino, Nueva Vizcaya, Aurora, Nueva Ecija, Tarlac, Zambales, Bataan, Pampanga, Bulacan, Cavite, Laguna, Batangas, Rizal, Quezon (agraman Pollilo Islands), Masbate (agraman Ticao Island ken Burias Island), Marinduque, Romblon, Camarines Norte, Camarines Sur, Albay, Sorsogon, Eastern Samar, Northern Samar, Samar, Leyte, Biliran, Southern Leyte, Dinagat Islands, ken Surigao del Norte (agraman ti Siargao-Bucas Grande Group).
Kinuna ti PAGASA a mabalin nga agdisso ni Kristine kas severe tropical storm iti Isabela wenno iti amianan ti Aurora inton Oktubre 23, ket mabalin a maingato agingga iti TCWS No. 3 dagiti pakdaar.
Itay 10:00 ti agsapa, nasaripatpatan ti sentro ni Bagyo Kristine iti 335 a kilometro iti daya ti Virac, Catanduanes. (Ellalyn De Vera-Ruiz/Manila Bulletin//Lito Hilidon/Bannawag)
