Impakaammo ti Philippine Atmospheric, Geophysical and Astronomical Services Administration (PAGASA) ita, Oktubre 22, a nagbalinen a bagyo ti dati a tropical depression “Kristine” (internasional a nagan "Trami").
Segun iti PAGASA, nasaripatpatanda ni Kristine iti 390 a kilometro iti daya ti Virac, Catanduanes. Addaan iti kapigsa a 65 a kilometro tunggal oras iti asideg ti sentrona, ken pugso a 80 kilometro tunggal oras. Agpalaud ti bagyo iti kapardas a 15 kilometro tunggal oras.
Kinuna ti PAGASA a mabalin nga agdisso ni Kristine a kas severe tropical storm iti Isabela inton bigat, Oktubre 23, ken manamnama a rummuar iti Philippine Area of Responsibility inton Oktubre 25 (Biernes).
Naibayogen ti Signal No. 1 iti daya ken tengnga a paset ti Cagayan, Isabela, Quirino, abagatan a paset ti Nueva Vizcaya, Aurora, daya a paset ti Rizal, daya a paset ti Laguna, amianan ken daya apaset ti Quezon (agraman Polillo Islands), Marinduque, Romblon, Camarines Norte, Camarines Sur, Catanduanes, Albay, Sorsogon, Masbate (agraman Ticao ken Burias Islands), Eastern Samar, Northern Samar, Samar, Leyte, Biliran, Southern Leyte, Dinagat Islands, ken Surigao del Norte (agraman dagiti isla ti Siargao-Bucas Grande). (Ellalyn De Vera-Ruiz/Manila Bulletin//Lito Hilidon/Bannawag)
