Nagdeklarar iti state of calamity ti entero a probinsia ti Albay itay Oktubre 22 gapu iti nakaro a panaglayus ken panagreggaay ti daga gapu iti napigsa a tudo nga inyeg ni Bagyo "Kristine."
Kinuna ni Board Member a daulo ti Liga ng mga Barangay Hisham Ismail a naanamongan ti deklarasion iti regular a sesion ti Sangguniang Panlalawigan (SP) itay Oktubre 22.
Naibakuit ti nasurok a 500 a pamilia wenno 1,000 a katao iti ili ti Guinobatan ken Camalig gapu iti pangta ti lahar manipud iti Bulkan Mayon a pinarnuay ni Kristine.
Segun ken ni daulo ti Guinobatan Municipal Disaster Risk Reduction and Management Office Joy Rañola-Maravillas, di nababbaba ngem iti 533 a pamilia manipud iti Barangay Maninila ken Tandarora ti nayallatiwen iti Guinobatan Community College iti Barangay Mauraro.
Ilocos Sur, Umuna a Puesto iti Regional SubayBAYANI Awards
Kinuna ni Gremil Naz ti Office of the Civil Defense (OCD)-Bicol nga addan 195 a pamilia wenno 740 a katao ti nagbakuit iti Camarines Sur, Masbate, Catanduanes, Camarines Norte, ken Naga City itay Oktubre 22.
Naireport ti nakaro a layus iti ili ti Libon a nangyanud kadagiti sumagmamano a balbalay.
Nalayus met ti dadduma a paset ti Legazpi City, Daraga, Guinobatan, Polangui, Oas, Tiwi, ken Santo Domingo. (Nino N. Luces/Manila Bulletin//Lito Hilidon/Bannawag)
