Kinompirmar ni dati a general manager ti Philippine Charity Sweepstakes Office (PCSO) Royina Garma nga adda Davao Death Squad (DDS).
Iti suplementario nga apidabit a naidatag iti Quad Committee (Quad-comm) ti Kamara a mangim-imbestigar iti extrajudicial killings (EJKs) mainaig iti kampania kontra iti droga, imbutaktak ni Garma dagiti nalimed nga operasion ti DDS a kas kunana nga ammo amin nga opisial ti polisia iti Siudad ti Davao, a teritorio ni dati a Presidente Rodrigo Duterte, daytoy a maar-aramid.
Segun ken ni Garma, naammuanna ti maipapan iti makunkuna a Davao Death Squad manipud iti nadumaduma a source bayat ti pannakaidestinona iti Davao, ken ammo amin nga opisial ti polisia a dandani amin nga station commander ket addaan ti espesial a grupo para iti espesipiko nga operasion.
Kinuna ni Garma, a nagpaay nga opisial ti polisia iti Davao City sipud 1997, a saan a maipalubos kadagiti opisial ti polisia a pagsasaritaanda dagiti operasion ti DDS gapu ta nasaknap ti "kultura ti panagulimek" iti operasion ti polisia. (Filane Mikee Cervantes/PNA//Lito Hilidon/Bannawag)
