Iti panagbigbigna iti agbalbaliw a kasasaad iti mision ti Philippine Coast Guard (PCG), nangruna iti West Philippine Sea (WPS), imbalakad ni Presidente Ferdinand Marcos Jr. a saanda nga agmaymaysa a mangibaklay iti nadagsen a pagrebbenganda.
Iti panagbitla ni Presidente Marcos Jr. (PBBM) iti maika-123 nga anibersario ti pannakabangon ti PCG itay Oktubre 22, impasingked ni PBBM ti panangsuportar ti administrasionna iti panangpasayaat iti armada ken alikamen iti tangatang ti PCG, naan-anay a pannakaammo iti masakupan a taaw, pannakabalin iti armas, ken dagiti kasapulan nga impraestruktura tapno mapabileg pay ti PCG.
Pinadayawan ni PBBM ti PCG iti kinaridamda a mangsalaknib iti kappia ken urnos iti taaw, ken ti kinatangda a manglapped iti panagkaro ti risiris.
Indagadag ni PBBM ti PCG a makitinnulongda kadagiti maseknan nga ahensia iti panagtalinaed iti kinatalged ti biag ken sanikua iti taaw, panangsalaknib iti aglawlaw, ken panangipatungpal iti linteg ti taaw. (Betheena Unite/Manila Bulletin//Lito Hilidon/Bannawag)
