Insingasing ni Presidente Ferdinand Marcos Jr. (PBBM) ti nasaksakbay a panagibulos iti danum kadagiti sumagmamano a dam tapno maliklikan ti dakdakkel a didigra, bayat a pumigpigsa ni Bagyo Kristine iti las-ud ti 24 oras.
Daytoy ti kinuna ni PBBM bayat nga asidegen a madanon ti gagangay a kangato ti danum iti Angat, Ipo, ken La Mesa dam itoy nga Oktubre 23.
Iti situation briefing maipapan iti epekto ni Bagyo Kristine, impakdaar ti Presidente a dagiti danum ti dam ti rumbeng a bantayan ti gobierno. Insingasing ni PBBM a nasaksakbay koma ti pannakaibulos ti danum iti kapardas a saan a maapektaran dagiti agindeg iti baba ti dam.
Maibatay iti datos ti Philippine Atmospheric, Geophysical and Astronomical Services Administration (PAGASA), dimmanonen iti 197.63 a metro ti kangato ti danum iti Angat Dam itay agsapa (Okt. 23), bassit laengen tapno madanon ti high water level a 210 a metro.
Australiano, 2 pay, natiliw gapu iti bogus a doliar
Nangrugi met a mangiruar iti danum ti Ipo Dam itay 10:00 iti bigat apaman a dimmanon iti 100.5 a metro ti danumna, bassit laengen tapno madanonna ti high water level a 101.10 a metro.
Iti La Mesa Dam, nga addaan iti high water level a 80.15 a metro ket dimmanonen iti 79.50 a metro ti kangato ti danumna.
Manamnama ti napigsa a tudo, napigsa nga angin, ken storm surge iti entero a pagilian, kangrunaan iti Ilocos Region, Cagayan Valley, Central Luzon, ti Cordillera Administrative Region, Calabarzon, ti Bicol Region, ken Eastern Visayas kadagiti sumarsaruno nga al-aldaw.
Mapattapatta nga in-inut a pumigsa ni Bagyo Kristine ket agbalin a severe tropical storm sakbay nga agdisso iti Isabela wenno iti Northern Aurora inton rabii (Mierkoles) wenno agsapa ti Huebes (Okt. 24). (Argyll Cyrus Geducos/Manila Bulletin//Lito Hilidon/Bannawag)
