Rinugianen ni Severe Tropical Storm “Kristine” (internasional a nagan “Trami”) a panurnoren ti Cordillera Administrative Region (CAR) ita nga agsapa (Oktubre 24), kalpasan a nagdisso daytoy iti Divilacan, Isabela, kinuna ti Philippine Atmospheric, Geophysical and Astronomical Services Administration (PAGASA).
Iti kaudian a pakaammo ti PAGASA itay 8:00 ti bigat, addan ni Kristine iti Aguinaldo, Ifugao ket agpalpalaud iti kapardas a 20 kilometro tunggal oras. Nagtalinaed ti nalawa a sirkulasion ni Bagyo Kristine nga addaan iti diametro a 1,400 agingga 1,500 a kilometro, ket ap-apektaranna latta ti Luzon ken ti dadduma a paset ti Visayas.
Nagtalinaed ti pigsa ni Kristine a 95 a kilometro tunggal oras iti asideg ti sentrona ken pugso a 160 kilometro tunggal oras.
Naibayog ti Signal No. 3 iti abagatan a paset ti Cagayan, Isabela, Quirino, Nueva Vizcaya, Kalinga, Mountain Province, Ifugao, abagatan a paset ti Abra, Benguet, amianan ken tengnga a paset ti Aurora, amianan a paset ti Nueva Ecija, amianan a paset ti Tarlac, amianan a paset ti Zambales, Pangasinan, La Union, ken ti abagatan ken sentro a paset ti Ilocos Sur.
Australiano, 2 pay, natiliw gapu iti bogus a doliar
Nagtalinaed iti Signal No. 2 ti Metro Manila, Ilocos Norte, ti dadduma a paset ti Ilocos Sur, Apayao, dadduma a paset ti Cagayan (agraman Babuyan Islands), dadduma a paset ti Aurora, dadduma a paset ti Nueva Ecija, Bulacan, dadduma pay a paset ti Tarlac, Pampanga, dadduma a paset ti Zambales, Bataan, Cavite, Laguna, Rizal, Batangas, ti amianan ken sentro ti Quezon agraman Polillo Islands, ken ti Lubang Island.
Signal No. 1 kadagiti lugar ti Batanes, dadduma a paset ti Quezon, Occidental Mindoro, Oriental Mindoro, Marinduque, Romblon, amianan a paset ti kadaklan ti Palawan agraman Calamian Islands ken Cuyo Islands, Camarines Norte, Camarines Sur, Catanduanes, Albay, Sorsogon, Masbate (agraman Ticao ken Burias Island), Aklan, Capiz, Antique (agraman Caluya Islands), Iloilo, Bantayan Islands, Northern Samar, amianan a paset ti Samar, Biliran, amianan a paset ti Eastern Samar, ken ti amianan a laud ti Leyte.
Panurnoren ni Kristine ti Northern Luzon iti las-ud a 12 nga oras ken manamnama a rummuar iti baybay ti Ilocos Region ita a malem (Okt. 24).
Iti sabali a bangir, nasaripatpatan ti PAGASA ti maysa a low-pressure area (LPA) iti ruar ti Filipinas, ngem awan pay ti direkta nga epekto daytoy iti pagilian. (Ellalyn De Vera-Ruiz/Manila Bulletin//Lito Hilidon/Bannawag)
