Naluktan itay nabiit ti Umuna a Salip iti Sarita ti Norberto D. Bumanglag Literary Awards (Bumanglag Awards) para kadagiti agdadamo a mannurat. Isponsoran daytoy ni 2020 Pedro Bucaneg Awardee Norberto D. Bumanglag Jr. ti San Nicolas, Ilocos Norte ken nobelista ti Bannawag.
Ti met Bannawag (ibagian ni Juan Al. Asuncion, kas Chair) ken ti GUMIL Ilocos Norte (ibagian ni Daniel L. Nesperos, kas Co-Chair) ti mangimaton iti pasalip.
Dagiti pagannurotan:
1. Naluktan ti salip idi Oktubre 20, 2024 ken aggibus iti Marso 15, 2025.
Mamannurat a nangabak iti Albalos 2024 ken AMMAFLA 2024, mapadayawan inton Okt. 18 iti Dap-ayan 2024 ti GUMIL Filipinas iti Siudad ti Candon
2. Nairanta daytoy a salip kadagiti agdadamo a mannurat iti Ilokano. Kualipikado a makisalip ditoy dagiti awan pay naipablaakna a sarita iti Bannawag (saan a mairaman ditoy ti flash fiction). No adda man naipablaaknan, di koma nasursurok ngem lima agingga iti Oktubre 16-31, 2024 a bilang ti Bannawag.
3. Maikkan ti autor iti wayawaya a mangpili iti topiko ti isalipna a sarita.
4. Agatiddog ti isalip a sarita iti 10-15 a panid iti letter size (8.5” x 11”), Times New Roman, font size 12, medium, iti doble espasio (2.0), addaan iti normal a margin, ken iti MS Word document format.
5. Maysa laeng a sarita ti mabalin nga isalip ti tunggal autor.
6. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna.
7. Iti sarita a maisalip, ilanad ti autor ti paulo ti saritana ngem dina iramraman ti naganna (pudno man wenno parbo a nagan). Ipatulod ti pakisalip babaen ti e-mail. Mangipatulod met iti pakasaritaan ti autor iti sabali a file. Ilanad iti nasao a file dagitoy: paulo ti pakisalip, nagan, kaudian a ladawan, ababa a pakasaritaan ti biag, adres ti agdama a pagnaedan, ken numero ti selpon.
8. Aggiddan nga ipatulod ti pakisalip (umuna a file) agraman ti pakasaritaan ti autor (maikadua a file) iti daytoy nga e-mail address: [email protected]. Iti Subject ti e-mail, ilanad daytoy: ENTRY ITI BUMANGLAG AWARDS 2025. Saan a mairaman iti salip ti entry a maawat kalpasan ti Marso 15, 2025.
9. Dagiti gunggona: Umuna a Gunggona, PhP10,000.00, medalia, ken sertipiko; Maikadua, PhP8,500.00 ken sertipiko; ken Maikatlo, PhP7,000.00 ken sertipiko. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalin met a mangparnuayda iti sabali wenno nayon a gunggona, no kasapulan.
10. No matakuatan a sinalungasing ti mangabak ti ania man kadagiti Pagannurotan Blng. 2 ken Blng. 6, maibabawi ti premiona ken mapawilanton a makisalip iti ania man a pasalip ti Bumanglag Awards.
11. Mapakaammuanto dagiti mangabak no kaano ken sadino ti pakapadayawanda. --O
